පුංචි තිරයේ අහිංසකාව නිල්මිණි තෙන්නකෝන්

පුංචි තිරයේ අහිංසකාව නිල්මිණි තෙන්නකෝන්

ආදරයේ වටිනාකම, අගය කෙනෙකුට වැඩියෙන්ම දැනෙන්නේ ඒ ආදරයේ උණුසුම අහිමි වුණාට පස්සේ. ඒත් ආදරය කියන්නේ සිර කරලා, විලංගු දාලා එක තැනක තියා ගන්න පුළුවන් දෙයක් නොවේ. හරියට අත්තෙන් අත්තට පනින පුංචි කුරුල්ලෙක් වගේ.

ඒ වගේම ජීවිතයක වටිනාකමක් තදින්ම අපේ සිතට දැනෙන්නේ මරණයේ දොරටුව ළඟදි කියලා මම අහලා තියෙනවා. ඒ අත්දැකීමට මුහුණ දුන් කෙනෙකුට හුස්ම පොදක අගය වදන් දහසකින්වත් කියා ගන්නට බැරිව ඇති.

හැබැයි ජීවිතය කියන්නේ සිනා සාගරයක්වත්, කඳුළු උල්පතක්වත් විතරක් නෙවේ. මේ දෙකේම අපූරු සංකලනයක්. ජීවිතය දිගු හසරැල්ලක් වෙනවාට වඩා පුංචි පුංචි කඳුළු කතා ඒකට එකතු වුණාම තමයි අපි හැබෑවටම ජීවත් වෙනවයි කියන සුන්දර හැඟීම සිතට දැනෙන්නේ.

ඒ ජීවිතයත්, ආදරයත් ගැන ඉතාම සරලව මට හිතෙන හැටි. මා එක්ක එකඟ වන අය වගේම නොවන අයත් ඉන්න පුළුවන්. ඒත් මේ මට හිතෙන හැටි. ඒ සිතිවිල්ලට නිමිත්ත වුණේ පුංචි තිරයේ අහිංසකාව, ජනපි‍්‍රයත්වයෙන් මෙන්ම විශිෂ්ටත්වයෙන් ද පිරිපුන් අපේ ආදරණීය නිළිය නිල්මිණි තෙන්නකෝන් ගැන ලියන්නට සැරසෙන මේ ලිපිය.

ඉතිං, කොහොම ද නිල්මිණි මොනවද අලුත් තොරතුරු ........?

කවදත් ළෙන්ගතු සිනහව අදත් නොවෙනස්ව ඈ වතෙහි දිදුළන්නේ අපේ කතාබහට සොඳුරු ආරම්භයක් ලබා දෙමින්.....

කියන්න තරම් වරදක් නැහැ. සතුටෙන් ඉන්නවා. පසුගිය කාලේ මම ටෙලි නාට්‍යය කිහිපයකම රූගත කිරීම් අවසන් කළා. සසර සරණී, හිතුවක්කාරි, දිය යට ගිනි, සහ තවත් ටෙලි නාට්‍යයකට මම රංගනයෙන් දායක වුණා.ඒවා ඉදිරියේදී විකාශය වීමට නියමිතයි.

මොන වගේ චරිත ද ඔයාට රඟපාන්න ලැබුණේ ?

“සසර සරණී” ටෙලි නාට්‍යයේ මම රඟපාන්නේ දසසිල් මැණියකුගේ චරිතයක්. එතකොට ‘හිතුවක්කාරී’ ටෙලි නාට්‍යයේ වලං හදන, දුක්බර ජීවිතයක් ගත කරන කාන්තාවකගේ චරිතයක් මම නිරූපණය කළා. “දිය යට ගිනි”ටෙලි නාට්‍යයේ චරිතය මේ දෙකටම වෙනස්. ඒක රහස් පරීක්ෂක කතාවක්. රූමත්, විවාහක කාන්තාවකගේ චරිතයක් මට එහි රඟපාන්න තිබුණේ. ඒකේ කතාව කියන්න හොඳ නැහැ. එහෙම වුණොත් අපරාදේ.

තවත් ටෙලි නාට්‍යයක මම රඟපෑවා. නමුත් ඒකට තවම නිශ්චිත නමක් යොදා නැහැ. මම හිතන්නේ ඒ චරිතය මගේ රංගන ජීවිතයේ විශාල පෙරළියක් වේවි. ජීවිතයේ අනන්ත දුක් ගැහැට විඳ දරා ගෙන ජීවත් වෙන්න උත්සාහ දරන කාන්තාවකගේ භූමිකාවක් එය. අවසානයේදී ඇයට පිස්සු හැදෙනවා. ඉතාමත් ආසාවෙන් මම ඒ චරිතය කළේ.

නිල්මිණි, ලැබෙන හැම ආරාධනාවක්ම පිළිගන්නවා ද?

නැහැ, ඇත්තටම මම එදා ඉඳන්ම රඟපෑවේ තෝරා බේරාගෙන. අදටත් ඒකේ වෙනසක් නැහැ. ඒ නිසා ඇතැම් ටෙලි නාට්‍යය මට ප්‍රතික්ෂේප කරන්න වුණා. නමුත් තවත් පැත්තකින් අපට අසාධාරණයක් වෙනවා. අපි රඟපාන ටෙලි නාට්‍යය විකාශය වෙන්න අද නාළිකාවක්, විකාශන කාලයක් නැහැ.

මට වුණත් නිෂ්පාදන කටයුත්තකට අත ගහන්න ලොකු වුවමනාවක් තියෙනවා. අපිට බෙල්ට් එකක් නැහැ. අන්තිමට ඉනට දාන බෙල්ට් එකක් තමයි හොයා ගන්න වෙලා තියෙන්නේ. මේක මට විතරක් වුණ අසාධාරණයක් නෙවෙයිි. ටෙලි නාට්‍යය ක්ෂේත්‍රයේ ගොඩ දෙනෙකුට මේ ප්‍රශ්නය තියෙනවා.

ඔය කියන්නේ මෙගා ටෙලි නාට්‍යය නිසා ඒ ඉඩකඩ ඇහිරුණා කියල ද?

මේ ක්ෂේත්‍රයේ අත්දැකීම් බහුල, නිළියක් හැටියටයි මම කතා කරන්නේ. ඇත්තෙන්ම අධ්‍යක්‍ෂවරුන්ට විශාල අසාධාරණයක් වෙනවා මේ මෙගා ටෙලි නාට්‍යය නිසා. ඒ වගේම නිෂ්පාදකයන්ට පවා.

දැන් මමත් භාගයක් මුදල් යොදවා කළ ටෙලි නාට්‍යයක් තියෙනවා. නමුත් විකාශය කරන්න බෙල්ට් එකක් නැහැ. අපි මේක ජනාධිපතිතුමාටත් කිව්වා. ඇත්තෙන්ම මේ ටෙලි නාට්‍යය එක්තරා රූපවාහිනී නාළිකාවකින් පවා අනුමත කළා. නමුත් ඔවුන්ගේ මෙගා ටෙලි නාට්‍යය නිසා අරක දිහා හැරිලාවත් බලන්නේ නැහැ.

එතකොට ඔයා රඟ පෑ “දූ - දරුවෝ “ අපේ දීර්ඝ ටෙලි නාට්‍යය රැල්ලේ ආරම්භය කියලා කෙනෙක් තර්ක කළොත්.....?

ඔව් “දූ දරුවෝ” මෙගා ටෙලි නාට්‍යයක් තමයි. ඒත් ඇත්තෙන්ම එතන තිබුණේ කලාවක්. අනෙක තවත් ටෙලි නාට්‍යය විකාශය කරන්න ඕනෑ තරම් බෙල්ට්ස් තිබුණා. “දූ දරුවෝ” විකාශය වුණේ සතියකට එක වතාවයි. අද සමාජය, ලෝකය, තාක්ෂණය දියුණු වෙලා. මේ ක්ෂේත්‍රයට යොමු වෙලා ඉන්න පිරිස වැඩියි. ඒ අතරේ අහිංසක නිෂ්පාදකවරු, අධ්‍යක්ෂවරු ඉන්නවා. ඔවුන් රැක ගන්න නම් අපි මේ මෙගා ටෙලි නාට්‍යය රැල්ලට එරෙහිව වැට බඳින්න ඕනෑ.

ඒ කතාවට තිබෙන පදනම මොකක්ද.......?

මෙගා ටෙලි නාට්‍ය වල කිසිම අර්ථයක් නෑ. ඒ වගේම නළු නිළියන්ගේ රංගනයේ කිසිම සුවිශේෂී බවක්, හැකියාවක් ඉස්මතුවීමක් මා දැක නැහැ.

නමුත් මේ මෙගා ටෙලි නාට්‍යය කර්මාන්ත නිසා යැපෙන විශාල පිරිසක් අද ඉන්නවා. සමහරෙකුගේ ජීවනෝපාය වෙලා තියෙන්නේ මෙගා ටෙලි නාට්‍ය....?

ජීවනෝපාය කියලා මේ වගේ දේවල්වලට සම්බන්ධ නොවී එහෙනම් එයාලට කඩයක් දාගන්න තිබුණා. ඒක තමයි හොඳම දේ, කලාව බිස්නස් එකක් කර ගන්න හොඳ නෑ.

එතකොට ඔයා කවදාවත් මේක බිස්නස් එකක් කරගත්තේ නැහැ....?

අපෝ නැහැ. කවදාවත් නැහැ. අපි නිකං ගිහින් රඟපාලා තියෙනවා. ඒ අපි ටෙලි නාට්‍ය කලාවට ආදරය නිසා. මම ටෙලි නාට්‍ය ක්ෂේත්‍රයට එක්වුණේ ඩී.බී. නිහාල්සිංහයන්ගේ “දිමුතු මුතු” ටෙලි නාට්‍යයෙන්. ඉන් පසු මට ප්‍රවීණ අධ්‍යක්ෂවරුන් රැසක් යටතේ රඟපාන්න අවස්ථාව ලැබුණා. අපි ඒ අයගෙන් බොහෝ දේ ඉගෙන ගත්තා. ගුරු හරුකම් ලැබුණා අපට. ඒ බොහෝ දෙනෙක් අද මේ කලාවෙන් ඈත් වෙලා. දැන්වත් මෙගා නවත්වන්න ඕනෑ.

අද බොහෝ තරුණ තරුණියන් රංගනයට යොමුවෙලා ඉන්නවා. ඒ බොහෝ දෙනෙක් ප්‍රේක්‍ෂක අවධානය දිනා ගන්නේ, ජනපි‍්‍රයත්වයට පත් වෙන්නේ මේ මෙගා ටෙලි නාට්‍ය හරහා. ඔවුන්ට කියන්න විශේෂ යමක් තියෙනවා ද?

අපි මේ යම්කිසි දෙයක් රඟපෑම ගැන ඉගෙන ගත්තා නම් ඉගෙන ගත්තේ චරිත රාශියක් කරලා. විවිධාකාර චරිත අපට ලැබුණා. දැන් ඉන්න ළමයින්ට ඒ වගේ චරිත ලැබෙනවද? එවෙලේ ලියලා දෙන තිර පිටපත්වලට තමයි ඒ අය ගොඩක් වෙලාවට තමුන්ගේ රඟපෑම් ඉදිරිපත් කරන්නේ. ලොකේෂන් එකට ඒ කොලේ අරන් ආපුවාම අර ළමයි ඒක බලාගෙන ඇක්ට් කරනවා. ඒ අය වැඩි දෙනෙක් සෙට් එකේ ඉන්නේ ඒ ගොල්ලන්ගේ ජංගම දුරකතනයන් එක්ක. ඉතින් මේක තමයි චරිතය කියලා අර කොළේ දුන්නම ඒ අය කෙහොමද රඟපාන්නේ.

“දූ - දරුවෝ “ වගේ ටෙලි නාට්‍යයක් එක්ක සංසන්දනාත්මකව බලද්දී අද හැදෙන ටෙලි නාට්‍ය ගැන නිල්මිණිට මොකද හිතෙන්නේ.......?

අම්මෝ, විශාල වෙනසක්. ඒවායේ හිටියේ දැවැන්ත නළු, නිළියන්. සෝමවීර සේනානායක ගේ පිටපත, නාලන් මෙන්ඩිස්ගේ අධ්‍යක්ෂණය. ඒ සුසංයෝගයෙන් තමයි මේ ටෙලි නාට්‍යය නිර්මාණය වූණේ. මට තාම මතකයි දීප්තීගේ චරිතයට අවශ්‍ය වුණේ කොට කොණ්ඩයක්. මට විග් එකක් දාන්නයි මුලදී අදහස තිබුණේ. සන්ධ්‍යා මෙන්ඩිස් මහත්මිය ළඟට මාව එක් කරගෙන ගියා.

එතන දී මම ඇහුවා, විග් එකක් නොදා මගේම කොණ්ඩෙ කොට කරලා පෙන්නන්න ද කියලා. මම එවෙලේ හදලා පෙන්නපු කොණ්ඩේ තමා ‘ දූ – දරුවෝ “ එසේ අනුමත කළේ. කොටස් දෙසීයක් යනකල් ඒ කොණ්ඩේ හැමදාම දාගත්තේ මම. අවුරුදු ගාණක් ඒ වැඩේ කළා මේකප් ආටිස්ගේ උදවු නැතිව. ඒකේ පළමුවැනි දර්ශනය රූගත කළාට පස්සේ සෝමවීර සේනානායකයන් ඒක නැරඹුවා. බලලා කිව්වේ මොකක් ද නිල්මිණි ගේ සීන්ස් රී ෂූට් කරන්න කියලා.

ඇයි ඒ......?

මොකද දීප්තිට කවදාවත් ටයිට් ජීන්ස් අඳින්න බැහැ. එයාගේ ඔළුවේ හිටියේ සුදු ෂර්ට්, බාච්චු කලිසම් ඇඳ ගත්තු කෙල්ලක්. නිල්මිණි ගේ ඇෙඟ් තියෙන හැඩේ පෙන්නන එපා. ඒ චරිතෙ වැටෙනවා එහෙම වුණොත්. එයා හැඩට අඳින කෙනෙක් නෙමේ. බොහොම සරලව අඳින පළඳින කෙනෙක් කියලා සෝමවීර සේනානායකයන් තමන්ට අවශ්‍ය පරිදි දීප්තිගේ චරිතය ලබා ගන්න අපට උපදෙස් දුන්නා. ඒ සීන්ස් නැවත රූගත කළා. මම මේ පොඩි උදාහරණයක් කිව්වේ. අන්න ඒ සහයෝගය, සම්බන්ධය නිසා තමයි දීප්තිගේ චරිතය අර තරම් සාර්ථක වුණේ. අද වගේ එහෙම කැපවීමක් කරයි ද.....?

සමහරු තාමත් ඔයාට කතා කරන්නේ දීප්ති කියලලු ?

අදටත් ඇත්තටම මට එහෙම කතා කරන අය ඉන්නවා. “දූ දරුවෝ” මතක් කරනවා. අදටත් සැලෝන්ස්වලට ගිහින් අපිට දීප්ති කට් එක දෙන්න කියලා ඉල්ලන තරුණියෝ ඉන්නවා. ඒ කාලේත් දීප්ති කට් කියලා එකක් හැදුණා. ඒ අපි කරපු දේවල්. මම කරපු ගොඩක් ඩ්‍රාමාස්වල ඒ ඒ කාලෙට දාලා තිබුණ හෙයාර් ස්ටයිල්ස් ඉම්ටේට් කළා. ජනපි‍්‍රයත්වය විතරක් නෙවෙයි. මම හිතන්නේ සාර්ථකත්වයත් තිබුණා ඒ චරිතවල. ඒකයි අපිව එයාලා අනුකරණය කළේ.

ඒ එදා, නමුත් අද ඒ වගේ නිවිහැනහිල්ලේ රඟපාන්න පුළුවන් වටපිටාවක් නෙවේ තියෙන්නේ. හැමතැනම කාර්ය බහුලයි. එදා නිල්මිණී තෙන්නකෝන් ගේ ඒ සංවේදී රංගනයන් අදත් අපට දැක බලාගන්න පුළුවන් කියල ද ඔයා කියන්නේ.

අනිවාර්යයෙන්ම. මම පසුගිය කාලේ ටෙලි නාට්‍යය කරද්දී එක සීන් එකක් කළොත් ඊළඟ එකට සූදානම් වෙද්දි පිටිපස්සෙන් ඇවිත් ඉන්නවා ;කාස්ටියුම්ස් අරගෙන. මම කවදාවත් කරන්නේ නැහැ ඒ විදිහට. හදිසිම අවස්ථාවක් තිබ්බොත් හැරෙන්න. කාගෙවත් ප්‍රොඩක්ෂන් එකක ලාබය සඳහා මම මගේ චරිතය පාවා දෙන්නේ නැහැ. සමහරු දවසකට කොස්ටියුම්ස් පහළොවක් විතර මාරු කරලා බිත්තියකට හරි හේත්තු කරලා ෂොට්ස් ටික ගන්නවා පස්සෙ ඩබ් කරනවා කියලා. ඒ වගේ වැඩ මම නම් කරන්නෙම නැහැ.

රඟපෑමේ දී එක් අන්තයකට කොටු නොවී විවිධ පරාසයන් කරා විහිදුණු චරිත රඟපෑමේ අවස්ථා ඔයාට ලැබුණා ද......?

මම හිතන්නේ ඒ අතින් මගේ පරම්පරාවේ මම තරම් වාසනාවන්ත වෙනත් නිළියක් නැහැ. මම රංගනය පටන් ගත්තේ පාසල් කාලේ ඉඳන්. මට අවුරුදු පහළොවක් විතර ඇති එතකොට. බ්‍රහස්පතින්දා, සිකුරාදා දවස්වල ස්කූල් කට් කරලා ඇවිත් තමයි ෂුටිං කළේ. ඉස්කෝලෙන් මට ලොකු කරදරයක් ඇති වුණා එතකොට. ඒ පටන් ගත්ත පටන් ගැනිල්ල මේ වෙනතුරුත් මම විවිධාකාර චරිත තුළින් ප්‍රේක්‍ෂකයන් අතරට ගියා. “ කුමාරයාණනි, “ නිදිකුම්බා මල්” ටෙලි නාට්‍යවල චරිතවල නම්වලින් අදටත් මිනිස්සු මට කතා කරනවා. මට නිල්මිණි තෙන්නකෝන් කිව්වම නොදන්න කෙනෙක් අද නැහැ. එදා තිබුණ ජනපි‍්‍රයත්වය තවමත් මට තියෙනවා.

එතකොට අද ඉන්න ඕනෑම නිළියක් එක්ක ඔයාට තරග කරන්න පුළුවන්.

ඔව්...... ඇත්තටම

කිසිම බයක් නැහැ.

බය නැහැ.

ඇත්තම කිව්වොත් අපි දන්න නිල්මිණි ජීවිතයේ නොයෙක් හැල හැප්පීම්වලට මුහුණ දුන් ගැහැනියක්. ඔයාගේ පෞද්ගලික ජීවිතයට සමාන චරිත කවදාවත් රඟපාලා නැති ද.....?

තියනවා, අනිවාර්යයෙන්ම තියෙනවා. එහෙම ඒවා වගේම ඇතැම් චරිත රඟපෑමට පස්සේ ඒවා මගේ ජීවිතයේ ඇත්තටමත් වෙලා තියෙනවා.

උදාහරණයක් කියන්න බලන්න.....?

ගොඩක් ඒවා. ‘නිදිකුම්බා මල්’, එතකොට ‘ලේ කිරි කඳුළු චිත්‍රපටය ගත්තොත් ඒකේ ලොකු රිය අනතුරක් තියෙනවා. මටත් ඇත්තටම ඒ අත්දැකීමට මුහුණ දෙන්න වුණා. ඒ වගේම මගේ ජීවිතේ සමහර සිද්ධි රඟපෑ චරිත හා සංසදනය වෙලා තියෙනවා. රඟපෑවට පස්සේ, සමහරක් එව්වා මගේ අත්දැකීම් තුළින් චරිතයට ගොනු වෙලා තියෙනවා.

ඇත්ත, මට දැන් ජීවිතය ගැන අලුතෙන් හිතන්න පුළුවන්. ඒ රිය අනතුර ගැන මම මේ දවස්වල පොතක් ලියාගෙන යනවා. ඒ කරුණු ගැන කවුරුත් විශ්වාස කරන එකකුත් නැහැ. මට පුංචි දුකක් තියෙනවා. මගේ රිය අනතුරටත් සමහරක් අය නොයෙකුත් කතා හැදුවා.

ඇත්තටම මම මැරිලා හිටියේ. ඒ මැරිලා හිටිය මටත් ගොඩක් කතා හදලා තියෙනවා සමහරු. මම සහ මගේ හිත දන්නවා මොකද වුණේ කියලා. ඔබ කිව්වා වගේ වෙනස් අලුත් ජීවිතයක් මට ලැබුණා. ඒක මට දෙවියෝ දුන්නේ. මගේ දරුවාව ජීවත් කරවන්න මැරෙන්න එපා. මෙහෙ එන්න එපා මට යන්න කිව්වා. මම ගියා. ඇත්තටම මම උඩින් ගියා . මම සේරම දේවල් දැක්කා.

මේ සියල්ල දැකලා ආපහු ආව කෙනෙක් මම.

ඇත්තටම කියන්නකෝ කොහොම ද දැන් ශ්වේතා දූ .....?

එයා ලයිසියම් ජාත්‍යන්තර විදුහලේ තුන්වැනි ශ්‍රේණියේ ඉගෙනුම ලබනවා. ශ්වේතා ඉගෙනීමට වගේම ගීත ගායනටත් හරිම දක්‍ෂයි. කැමැතියි. හැබැයි එයා කියන්නේ හොඳට ඉගෙන ගෙන ටීචර් කෙනෙක් වෙන්න ඕනෑ කියලයි. චිත්‍රපට, ටෙලි නාට්‍යය කිහිපයකටම එයාල කතා කළා. ඒත් දුව කැමැති වුණේ නැහැ.

හොඳයි.......දැන් නිල්මිණි අලුත් වැඩකට අත ගහලා ඉන්නවා.”මෙගා ස්ටාර්” වැඩ සටහනෙන් ඔයාගේ ගායනා හැකියාවත් රටට පෙන්නන්න අවස්ථාව දැන් උදාවෙලා.....?

ඇත්තටම මෙතන හොඳම ගායකයෙක් හෝ හොඳම ගායිකාවක් බිහි කරන්න නෙවෙයි මේ වැඩ සටහනේ පරමාර්ථය වෙලා තියෙන්නේ. මේක රියැලිටි පෝග්‍රෑම් එකක් ස්ටාර් කෙනෙක් තෝරන. මට අමුතුවෙන් ස්ටාර් කෙනෙක් වෙන්න අවශ්‍ය නැහැ. මම මේ රටේ ස්ටාර් කෙනෙක්. ලංකාවේ තියෙන හැම සම්මාන උළෙලෙකම ජනපි‍්‍රය නිළිය වෙලා තියෙනවා. ස්ටාර් කෙනෙක් වෙන්න මට ආයේ ඕනෑ නැහැ.

නමුත් අපේ ජීවිතවලට හැමදාමත් වෙනසක් අවශ්‍යයි. වැරැදි දෙයක් නොවෙයි නේ මේක. වෙනසක් ඕනෑ නිසා ඒ වෙනසට මම කැමැති වුණා. ගොඩක් අය මට දොස් කියනවා අදටත් මේකට ගියා කියලා. නමුත් මම හිතනවා මෙතනදි අපට හානියක් වෙන්න නැතිව යම්කිසි වෙනසක් කරන්න හැකිවේවි කියලා.

Read More »

Read More »

අර්ජුන රණතුංග" පොදු අපෙක්ෂකයා වන හිටපු හමුදාපති "ජනරාල් ෆොන්සෙකා" ට

එක්සත් ජනතා නිදහස් සංවිධානයේ මන්ත්‍රී වරයකු වන "අර්ජුන රණතුංග" එක්සත් ජාතික පක්ෂය සහය දක්වන පොදු අපෙක්ෂකයා වන හිටපු හමුදාපති "ජනරාල් ෆොන්සෙකා" ට සහය දක්වන බව ඉයේ පුවත්පත් සකච්චාවකදී ප්‍රකාශ කළේය. ශ්‍රී ලංකා ක්‍රිකට් නායකයකු වන අර්ජුන රනතුන්ග ක්‍රිකට් නිසා ලබගත් ජනප්‍රිය බව මත ඩෙශපලනයට පිවිසියේය. මුලින්ම කෝට්ටේ සංවිධායක ධූරයෙන් ඉල්ලා අස්වූ අර්ජුන ක්‍රීකට් පලක මංඩලයේ සභාපති ධූරයද අහිමි කර ගත්තේය.

Read More »

සැමියාට පඩමක් උගන්වනවා..වසූදා

මීනා කුමාරි

ශ්‍රී ලාංකික සිනමා හා ටෙලිනාට්‍ය ක්‌ෂේත්‍රයේ යුග යුග පායන තරු අතුරින් ඇය සුවිශේෂය. සැබෑ ශ්‍රී ලාංකික කාන්තාව නොයෙක්‌ චරිතාංග තුළින් ඉස්‌මතු කිරීම ඇගේ රංගන ශෛලියේ අරමුණයි.

පුංචි තිරයෙත්, සිනමා හා වේදිකාවෙත් ප්‍රේක්‍ෂක රසික සහෘද හදවත් තුළ අභිෂේක ලැබූ ඇය, මීනා කුමාරිය. ඇගේ අලුත්ම සිනමා රංගාභිෂේකය, "කන්‍යාවී" ගැන මෙන්ම මීනාගේ පෞද්ගලික තොරතුරු ගැන දැන ගන්නත් එක්‌ක අපි ඇය හා පිළිසඳරක යෙදුනෙමු.

මීනා... කන්‍යාවී, චිත්‍රපටයට ඔබෙන් ලැබෙන දායකත්වය ගැන මුලින් යමක්‌ කියනවා නම්?

කන්‍යාවී චිත්‍රපටියේ ප්‍රධාන චරිතය වන ඉමායාගේ චරිතයට මම ජීවය දෙනවා. ඉමායා සමස්‌ත ලාංකික කාන්තා පරපුරටම ආදර්ශමත් චරිතයක්‌ හැටියටයි මම දකින්නෙ. සිරිතුංග පෙරේරා අධ්‍යක්‍ෂණය කළ ඉන්දික විඡේරත්න නිෂ්පාදනය කරමින් මෙම චිත්‍රපටිය නිර්මාණය වෙනවා. මේක කාලීන තේමාවක්‌ රැගත් හුඟාක්‌ පවුල් ජීවිත හා බද්ධ වුණු කතාවක්‌. මම මගේ දායකත්වය ඉමායා වෙනුවෙන් උපරිම අයුරින් ඉටු කළා.

"කන්‍යාවී"හි ඉමායා දරා ගැනීමේ ශක්‌තිය පිළිබිඹු කරන චරිතයක්‌. ඉමායාත් පුරුෂාධිපත්‍යයට යටපත් වන්නියක්‌ද?

තම ස්‌වාමියා වෙනත් සම්බන්ධකම් පවත්වා ගෙන යාම නිසා සමාජයේ තනිවන ගැහැනුන් කොතෙකුත් සිටිනවා. ඔහුගේම

රැකවරණය යෑපීම හමුවේ දරුවන් වෙනුවෙන් මෙන්ම සමාජයෙන් සිදුවන අවමානයන්ට බියෙන් ද කාන්තාවන් මෙම ප්‍රශ්නයේදී අනේක වේදනාවන් ද දරා ගෙන සිටිමින් මුණිවත රකිනවා.

එහෙත් ඉමායාට අවශ්‍ය නැහැ එහෙම ඉන්න.... ඉමායා වංශවත්, පොහොසත් පවුලක කාන්තාවක්‌. ඇය සියලු දේ දරා ගන්නෙ ස්‌වාමියා කෙරෙහි දැක්‌වූ ආදරය, සෙනෙහස කැප කිරීම් තවදුරටත් පවත්වාගෙන යාමේ අරමුණෙන්, එවැනි ප්‍රශ්නයකදී ස්‌වාමියා සමග අඩදඹර වෙමින් ජීවිතය ගෙවනවාට වඩා ඔහුගේ වැරැද්ද ඔහුටම අවබෝධ වන අයුරින් කටයුතු කිරීම වඩාත් බුද්ධිමත් දේ බව මෙම චිත්‍රපටියේ කතා තේමාවෙන් මොනවට ප්‍රත්‍යක්‍ෂ වෙනවා. ගැහැනිය මෙම ප්‍රශ්නයේදී මුහුණ දෙන ආකාරය වෙනත් කෝණයකින් බැලීමක්‌.

කන්‍යාවී චිත්‍රපටියේ ඉමායාට මුහුණ දෙන්නට සිදු වූ දේ ඔබට මුහුණ දෙන්නට සිදුවූවා නම්...?

මම ඇයව අනුමත කරනවා. ඇය ගත් තීරණමයි මමත් ගන්නෙ. ඇය මේ ප්‍රශ්නයේදී ඉතා උපේක්‌ෂා සහගතව කල්පනා කරනවා. අඩදඹර, හැලහැප්පීම් වෙනුවට ස්‌වාමි ගෞරවය යහ ගුණයෙන් කටයුතු කිරීම තුළින්ම ඔහුට යළිත් වැරැද්දක්‌ නොකරන්නට පාඩමක්‌ කියා දෙනවා.

මීනා මුලින්ම රංගනයට පිවිසුණේ...?

මම මුලින්ම රඟපෑවෙ ආරියරත්න ඇතුගලයන්ගේ "තුන්බිය" ටෙලිනාට්‍යයෙන්. පරාක්‍රම නිරිඇල්ලගෙ "විල්බැඳි දනව්ව" මෙන්ම "බෝගල සවුන්දරිස්‌", "සුරඟනන් ඇවිත්", "ජීවිතයට ඉඩ දෙන්න", "වසූදා", "පුණරාගමනය" ඇතුළු තවත් ටෙලිනාට්‍ය ගණනාවකට රංගනයෙන් දායක වුණා. සුගතපාල සිල්වාගේ ශාන්තුවර සෙබලානෝ, ධර්මසිරි බණ්‌ඩාරනායකගේ "ට්‍රොaජන් කාන්තාව" වැනි වේදිකා නාට්‍යවලත් මං රංගනයන් ඉදිරිපත් කළා.

"ඔබේ අලුත් නිර්මාණ ගැනත් සඳහන් කරන්න?

චන්ද්‍රරත්න මාපිටිගමගේ "කළුවර යාමය" වැඩ කටයුතු බොහෝ දුරට අවසන්. ඒ වගේම "කාලි" නමැති අහිංසක ගොළු කාන්තාවකගේ චරිතයක්‌ රැගත් ඉන්දියානු කලාත්මක චිත්‍රපටයකටත් මං සම්බන්ධ වුණා. ඒක මගේ පළමු ජාත්‍යන්තර චිත්‍රපටයයි. එය ඉන්දියානු කලාත්මක චිත්‍රපට සඳහා නියෝජනය වන්නක්‌. ලබන ජනවාරියේ සිට එය ඉන්දියාවේ තිරගත වීමට නියමිතයි.

ඔබේ පවුලේ තොරතුරුත් කියනවා නම්?

මගේ තාත්තා විශ්‍රම ගිය හමුදා නිලධාරියෙක්‌. මගේ මල්ලිත් යුධ හමුදා මේජර්වරයෙක්‌. නංගිත් කලාවට සම්බන්ධ වෙලා කටයුතු කරනවා. මගේ අක්‌කා ජාත්‍යන්තර පාසලක ගුරුවරියක්‌ හැටියට කටයුතු කරනවා. මගේ දුවත් මම අධ්‍යාපනය ලැබූ කොළඹ විශාඛා විද්‍යාලයේ ඉගෙනුම ලබනවා. සතුටින් ජීවිතය ගෙවනවා.

Read More »

ඔව්. මට පෙම්වතෙක් ඉන්නවා. ඔහු වෘත්තියෙන් ව්‍යාපාරිකයෙක්-නදීෂා හේමමාලි

රසික හදවත් තුළ ආදරණීය මතක සටහන් රැසක් තැබූ ඇය සිනමා තිරයේත් පුංචි තිරයේත් සැබෑම දඟකාරියකි.

සුන්දරත්වය, රංගන හැකියාව, ආකර්ෂණීය ලාලිත්‍යයෙන් අද වන විට රසික හදවත් තුළ අසීමිත ආදරයක් ජනපි‍්‍රයත්වයක් දිනූ මේ වාසනාවන්ත තාරකාවිය නමින් නදීෂා හේමමාලිය. අද මා සමඟ කතා බහට එක්වන්නේ මේ සොඳුරු සිතැත්තියයි.

ඉතිං... නදීෂා මොනවද ඔයාගෙ අලුත්ම තොරතුරු?

මේ දවස්වල නං මම ටිකක් කාර්ය බහුලයි. අනුර මාධව ජයසේකරගේ “සොඳුරු පියාපත්” ටෙලිනාට්‍යයට රංගනයෙන් දායක වෙනවා.

යුද්ධය පසුබිම් කරගෙන නිර්මාණය වුණු ටෙලිනාට්‍යයක් මෙය. මේ ටෙලිනාට්‍යයේ ‘ටානියා’ කියන මරාගෙන මැරෙන කොටි කාන්තාවගේ චරිතය තමයි මම නිරූපණය කරන්නේ.

මෙතෙක් කාලෙකට මට රඟපාන්න ලැබුණු වෙනස් ම ආරක චරිතයක් . මොකද මීට කලින් මේ වගේ චරිතයක් මම රඟපාලා නැහැ.

මම හිතනවා මේ චරිතය මට වගේ ම ප්‍රේක්‍ෂකයින්ටත් අලුත්ම අත්දැකීමක් ගෙන එයි කියලා.

ඔබ නිවේදිකාවක් ලෙසත් ප්‍රේක්‍ෂකයින් අතර ජනපි‍්‍රයයි. මේ ගැනත් කතා කරමු ද?

ස්වර්ණවාහිනියේ ‘ටැලන්ට් ශ්‍රී ලංකා’ වැඩසටහන ඉදිරිපත් කරන්නේ මම. ඇත්තටම මේ වගේ වැඩසටහනක් ඉදිරිපත් කරන්න ලැබීම ගැන සතුටු වෙනවා.

මොකද ඊට සහභාගි වෙන තරගකරුවන් ඉදිරිපත් කරන දක්ෂතා සියැසින් සජීවීව මට දකින්න පුළුවන් වුණේ ජීවිතේ පළමු වතාවට. ඇත්තටම ඒ තරගකරුවන්ගේ දක්ෂතා දැකලා මම මවිතයට පත්වුණා.

නදීෂා, රංගන ශිල්පිනියක් විදිහට ඔබ පැමිණි ගමන් මඟ ගැන මොකද හිතෙන්නේ?

මම කලා ක්‍ෂේත්‍රයේ රංගන ශිල්පිනියක් විදිහට මේ දක්වා නැගී සිටියේ තනිවම. මගේ ජීවිතේ ගත යුතු හැම තීරණයක් ම මම ගත්තේ තනිවම. හැම අභියෝගෙකටම මුහුණ දුන්නේත් තනිවම.

මම ආපු ගමන් මඟ ගැන මට තියෙන්නේ ලොකු විශ්වාසයක්. ඒ වගේ ම මම හිතන්නේ මම ගත්තේ නිවැරැදි තීරණ කියලයි. මම කිසිම දේකින් පසුතැවෙන කෙනෙක් නෙවෙයි.

ඔබ මේ වෙනකොට ආදරවන්තියක් නේද?

ඔව්. මට පෙම්වතෙක් ඉන්නවා. ඔහු වෘත්තියෙන් ව්‍යාපාරිකයෙක්. මාව හොඳින් තේරුම් ගත්ත කෙනෙක්.

මගේ කලා කටයුතුවලටත් ව්‍යාපාරික කටයුතුවලටත් ඔහුගෙන් ලැබෙන සහයෝගය අගය කළ යුතුයි.

කිසිම වෙලාවකට ඔහු මගේ ජීවිතයට නීතිරීති දාන්න එන්නේ නැහැ. ඒ වගේම ඔහුගෙන් මගේ කලා කටයුතුවලට බාධාවක් ඇතිවෙන්නේ නැහැ. ඔහු හැම විටම මාව දිරිමත් කරන ආදරණීය පෙම්වතෙක්.

ඒ කියන්නේ ඔයාගෙ විවාහයත් ළඟදීම සිදුවේවි නේද?

විවාහය ගැන ඇත්තටම ලොකු බලාපොරොත්තුවක් තියෙනවා. ඒත් ඉතින් තාම කවදද විවාහ වෙන්නේ කියල තීරණය කරල නැහැ. මගේ විවාහයට තව ටික කාලයක් ගතවේවි.

නදීෂා ජීවිතේ වඩාත් ම සතුටු වුණු දවස මතකද?

රංගන ශිල්පිනියක් විදිහට මම කැමරාවක් ඉදිරියට ගිය පළමු දවස තමයි මගේ ජීවිතේ මම වඩාත්ම සතුටු වුණු දවස.

ඒ වගේම පොදුවේ ගත්තහම මම මගේ ජීවිතේ හැම දෙයක් ගැනම සතුටු වෙනවා. මගේ බලාපොරොත්තු අද වෙනකොට සෑහෙන්න ඉටුවෙලා තියෙනවා. ඒ ගැන මට තියෙන්නේ අසීමිත සතුටක්.

ඔබේ අනාගත බලාපොරොත්තු මොනවාද?

විවාහ වෙලා සාර්ථක පවුල් ජීවිතයක් ගත කරන්න බලාපොරොත්තු වෙනවා. ඒ වගේම මගේ ව්‍යාපාර කටයුතු දියුණු කරගන්න බලාපොරොත්තු වෙනවා. මගේ හිතේ හීනයක් තියෙනවා කවදා හෝ සැබෑ කර ගත යුතු.

ඒ තමයි කවදාහරි ලංකාවේ දක්ෂතම නිළිය බවට පත්වෙන එක. ඒ වගේම මගේ නම ජාත්‍යන්තර සිනමාව කරා ගෙන යාම. ඒ වෙනුවෙන් මම කැපවී කටයුතු කරනවා.

Read More »

ජනාධිපතිතුමාගෙන් රෝයි - සුමනාට ඇමතුමක්

ජනාධිපතිතුමාගෙන් රෝයි - සුමනාට ඇමතුමක්

හෙළ සිනමාවේ අමරණීය කලාකරුවන් දෙපළක් වූ රෝයි - සුමනා ගේ නිවෙස හිත් පිත් නැති සොරුන්ගේ ග්‍රහණයට ලක්වීමේ කනගාටුදායක පුවත පසුගිය දිනෙක ‘රසඳුන’ සහෘද ඔබ වෙත වාර්තා කළේ සංවේගයෙන් යුතුව ය.
රෝයිටත් සුමනාටත් මුහුණපෑමට සිදු වුණු මේ විපත ගැන අප රටේ පළමු පුරවැසියා වන මහින්ද රාජපක්ෂ ජනාධිපතිතුමාට සැළ වූ වහාම එතුමා රෝයි -සුමනාට දුරකථනයෙන් කතා කළා. ඒ පිළිබඳ රෝයි - සුමනා අප සමඟ කීවේ මෙලෙසින්.
“අපි දෙන්නම ජනාධිපතිතුමාට ස්තුතිවන්ත විය යුතුයි. එතුමාට රටේ ලෝකෙ වැඩ කන්දරාවක් තියෙන ගමනුත් අපිට සිදුවුණු කරදරය ගැන අහන්න අමතක කළේ නැහැ. එතුමාගේ ඒ මහත්මා ගතිය අපි හැමදාමත් අගේ කරනවා. එතුමා මේ සොරකම ගැන විස්තර ඇහුවා.
එවේලෙම මේ ගැන කඩිනම් පරික්ෂණ පවත්වන්න කියලා පොලිස්පතිතුමාටත් පවසා තිබුණා. ඒ වගේ ම ආරක්ෂාවත් අවශ්‍ය ද කියලත් අපෙන් ඇහුවා. ජනාධිපතිතුමා දහසකුත් වැඩ අතර අපි වගේ කලාකරුවන් අගේ කිරීම ගැන, අපිට සිදුවන විපත්, කරදරවලදී අපි සමඟ සිටීම ඇත්තටම අපිට ලොකු ශක්තියක්.
සිංහල සිනමාවෙ ඉන්න සමහර අය අපෙන් මොකද වුණේවත් කියල ඇහුවෙ නැහැ. රටේ තොටේ මේ තරම් ප්‍රශ්න තියාගෙන ඒවා විසඳන්න කටයුතු කරමින් කාර්ය බහුල ජීවිතයක් ගත කරන ජනාධිපතිතුමා කලාකරුවන්ට මොනතරම් ආදරේද කියලා මෙයින් ම අපිට තේරෙනවා. අපේ දුක සැප ගැන හොයල බැලුවට ජනාධිපතිතුමාට මුළු හදවතින් ම අපේ ස්තුතිය - කෘතවේදිත්වය අපි පුද කරනවා.
තුෂාරි

Read More »

ජෙනරාල් සරත් ෆොන්සේකාපොදු ලකුණකින් ජනපතිවරණයට

විපක්‍ෂයේ ප්‍රධාන දේශපාලන පක්‍ෂවලට අයත් නොවන පොදු ලකුණකින් ජනාධිපතිවරණයට ඉදිරිපත්වීමට ජෙනරාල් සරත් ෆොන්සේකා මහතා එකඟත්වය පළකොට තිබෙන අතර ජනාධිපතිවරණය ප්‍රකාශයට පත්කර පැය 24 ක්‌ ගතවීමට පෙර ඒ බව රටට නිල වශයෙන් හෙළි කිරීමට සැලසුම් කොට ඇත.විපක්‍ෂයේ පොදු සන්ධානයට එක්‌ව සිටින සුළු පක්‍ෂයක ඡන්ද ලකුණකින් සරත් ෆොන්සේකා මහතා ජනාධිපතිවරණයට ඉදිරිපත් කිරීම පිළිබඳ පැවැති සියලු සාකච්ඡා මේ වන විට අවසන් කොට තිබේ. එක්‌සත් ජාතික පක්‍ෂය, ජනතා විමුක්‌ති පෙරමුණ, ශ්‍රී ලංකා මුස්‌ලිම් කොංග්‍රසය, ශ්‍රී ලංකා නිදහස්‌ පක්‍ෂයේ මහජන පාර්ශ්වය යන විපක්‍ෂයේ ප්‍රධාන දේශපාලන පක්‍ෂවලට අයත් නිල ලාංඡනයකින් ඉදිරිපත් නොවී සැමට පිළිගත හැකි සෑම දෙනාගේම එකඟත්වයක්‌ මත පොදු ලාංජනයකින් පොදු අපේක්‍ෂකයා ලෙස සරත් ෆොන්සේකා මහතා මෙලෙස ජනාධිපතිවරණ සටනට පැමිණේ.ජනතා විමුක්‌ති පෙරමුණ නව ඡන්ද ලාංඡනයක්‌ ලබා ගැනීම සඳහා දේශපාලන පක්‍ෂයක්‌ ලියාපදිංචි කිරීමට ඉල්ලුම් කළත් එය මැතිවරණ කොමසාරිස්‌වරයා විසින් ප්‍රතික්‌ෂේප කිරීමත් සමඟ පොදු අපේක්‍ෂකයා ඉදිරිපත් වන පක්‍ෂය සතු ලාංජනය පිළිබඳ අර්බුදය උත්සන්න විය.මේ අනුව සුළු පක්‍ෂයකට අයත් පොදු ඡන්ද ලකුණකින් ජනාධිපතිවරණයට ඉදිරිපත් වන සරත් ෆොන්සේකා මහතාගේ එම ඡන්ද ලකුණ සිංහල, දෙමළ, මුස්‌ලිම් ජනතාවන් අතර ප්‍රසිද්ධ කිරීම සඳහා පුළුල් ප්‍රචාරක වැඩපිළිවෙළක්‌ දියත් කිරීමට විපක්‍ෂය මේ වන විටත් සැලසුම් කොට ඇත. ජනාධිපතිවරණය පවත්වන බවට මැතිවරණ කොමසාරිස්‌වරයා විසින් නිල නිවේදන ප්‍රකාශයට පත්කළ වහා සරත් ෆොන්සේකා මහතාගේ නම සහ ඡන්ද සලකුණ ප්‍රකාශයට පත්කිරීමට විපක්‍ෂයේ දේශපාලන පක්‍ෂ ඒකමතික තීරණයකට පැමිණ ඇත

Read More »

ඇත්තද ඔයාට උයන්න, පිහින්න බෑ කියන්නේ?

පුංචි තිරය හරහා රටම ආකර්ෂණය කළ ජනප්‍රියම තරුව නෙහාරා පීරිස්

කුමාරසිංහ ආරච්චිගේ දෝන ක්‍රිහෂ්නි නෙහාරා කනීෂ්‍යා පීරිස්.
මේ කවුද කියා මා ඔබෙන් ඇසුවොත් එය එක්වරම පිළිතුරක් දෙන්නට බැරි පැනයක් වේවි ඔබට. ඒත් ඒ දිගු නමෙන් වදන් කිහිපයක් ඉවත් කර නෙහාරා පීරිස් කියූ සැනින් ඔබ දන්නවා ඈ කවුද කියා.

නෙහාරා පීරිස්.

‘මුතු කිරිල්ලී’ හරහා අපේ හදවතට ආදරය, සෙනෙහස මෙන්ම සුන්දරත්වය ද බෙදා දුන් ඈ වත්මන් ටෙලි නාට්‍යය ක්ෂේත්‍රයේ දිදුළන යොවුන් තාරකාවක්. ඒ බවත් අමුතුවෙන් කිව යුතු නැහැ ඔබට.

මේ ඈ ‘සරසවිය’ සමගින් කළ අතිශය ළෙන්ගතු කතාබහක වගතුගයි.

නෙහාරා මුලින්ම කියන්නකෝ ඔයාගේ උපන් දිනය?

මම ඉපදුණේ 1988 නොවැම්බර් 21.

ඒ කියන්නේ තව දවස් දෙකකින් ඔයාට අවුරුදු විසි දෙක ලබනවා.

ඔව්.

අපේ බොහෝ නිළියන් ක්ෂේත්‍රයට ආ මුල් කාලෙදි තමන්ගේ සැබෑ වයස හෙළි කළත් පස්සේ පස්සෙ වයස හංගනවා. ඔයත් එහෙම වෙයිද?

අනේ නැහැ. තව අවුරුදු දහයකින් ඇහුවත් මගේ නියම වයස එදාටත් කියනවා. කවදාවත් වයස හංගන්නේ නැහැ.

ඇයි ඒ . . . සාමාන්‍යයෙන් නිළියෝ වයස හංගනවනේ?

මම කැමැති අනෙක් හැමෝටම වඩා වෙනස් වෙන්න. අපි අපිටම බොරු කර ගන්න ඕනෑ නැහැනේ.

කොහොමද ටෙලි නාට්‍යය ක්ෂේත්‍රයට සම්බන්ධ වුණේ?

ටෙලි නාට්‍යය ක්ෂේත්‍රයට මම ආවේ 2007 දී. ඒත් 2006 වසරේදී මම රූපවාහිනී වෙළෙඳ දැන්වීම් කිහිපයකට පෙනී සිටියා. මගේ රුව ප්‍රේක්ෂකයන් මුලින්ම දුටුවේ ඒ දැන්වීම්වලින්.

මොනවද ඒ?

මුලින්ම මම කළේ ‘ලංකා බෙල්’ කොමර්ෂල් එක. ඊට පස්සේ ඩයලොග් ඇතුළු තවත් වෙළෙඳ දැන්වීම් කිහිපයක්. ඇත්තටම වීඩියෝ ඉමේජ් එකේ ක්‍රිස්ටෝ තමයි මට මේ අවස්ථාව ලබා දුන්නේ.

එතකොට ටෙලි නාට්‍යය ක්ෂේත්‍රයට යොමු වුණේ කොහොමද කියලා කිව්වේ නැහැනේ?

ඔව් නේ . . . මගේ මාමා ඉන්නේ අමෙරිකාවේ. ඔහු ලංකාවට ආ වෙලාවක අපි නාලන්, සන්ධ්‍යා මෙන්ඩිස් යුවළ හමු වෙන්න ගියා. ඒ ගිය වෙලේ සන්ධ්‍යා මෙන්ඩිස් මගෙන් ඇහුවා මෙහෙම ටෙලි නාට්‍යයක් කරනවා සම්බන්ධ වෙන්න කැමැතිද කියලා.

ඉතින් ඔයා මොකද කිව්වේ?

එවෙලේ හිතේ පුංචි ආසාවක් ඇති වුණා. ඒත් මට තනියම තීරණයක් ගන්න බැරි නිසා ඩැඩාගෙන් මේ ගැන ඇහුවා. එතකොට එයා කිව්වා එහෙනම් ෆස්ට් ඇන්ඩ් ලාස්ට් කියලා හිතාගෙන ඒ ටෙලි ඩ්‍රාමා එකේ ඇක්ට් කරන්න කියලා.

මොකක්ද ඒ ටෙලි නාට්‍යය?

‘සෙනෙහසට ආදරෙයි’. එකේ රශ්මි කියලා සුළු චරිතයක් මම කළේ. මම රඟපෑවේ හා(ර්)ට් පේෂන්ට් කෙනෙක් විදිහට. ඊට පස්සේ මට රවීන්ද්‍ර විජේරත්න ගේ ‘ජීවිතේ ලස්සනයි’ පුංචි චරිතයක් ලැබුණා නෙත්මි කියලා. ඒකේ එපිසෝඩ්ස් එකසිය අසූ ගාණක් ගියාට පස්සෙයි මගේ චරිතය ආවේ. ‘සිරස’ මැජික් Box වැඩ සටහන ප්‍රසන්ට් කරන්න මට අවස්ථාව ලැබුණේ ඔය අතරේදී.

එතනදි තමයි නෙහාරාගේ ජීවිතයේ ලොකු පෙරැළියක් සිදු වෙන්නේ නේද?

ඔව් . . . ඔව්. මැජික් Box ප්‍රසන්ට් කරද්දී තමයි මට ‘මුතු කිරිල්ලි’ ට ආරාධනා ලැබුණේ. ඒක අධ්‍යක්ෂණය කළේ ලිලන්ත කුමාරසිරි. සුසිල ආයතනයේ නිෂ්පාදනයක්. ඒ අනුවයි මට එහි සමාධි සහ මුතු වෙන්න අවස්ථාව ලැබුණේ.

හිතා ගන්න බැරි තරමේ ප්‍රේක්ෂක ප්‍රතිචාර ලැබුණා නේ?

ඇත්තටම ‘මුතු කිරිල්ලී’ මගේ ජීවිතය සම්පූර්ණයෙන්ම වෙනස් කළා. උඩුයටි කුරු කළා කිව්වොත් හරි. පොඩි කාලේ ඉඳන් මට ඕනෑකම තිබුණේ අම්මා වගේ ගෘහණියක් වෙන්න. ඒත් නිළියක් විදිහට දිගටම ක්ෂේත්‍රයේ රැඳෙන්න ඕනැයි කියන සිතිවිල්ල මගේ හිතට ආවේ මේ ලැබුණ රසික ප්‍රතිචාරත් එක්ක. මට හිතා ගන්න බැරි වුණා මිනිස්සු ඇයි මට මේ තරම් කැමැති කියලා.

දැන් ‘මුතු කිරිල්ලී’ ඉවරයි නේ. ඒත් තාමත් ප්‍රේක්ෂක ප්‍රතිචාර ලැබෙනවා මගෙ හිතේ?

අදටත් මට දවසකට ලියුම් තිස් පහක් විතර ලැබෙනවා. ප්‍රශ්නේ ඇයි එයාලා මට මේ තරම් ආදරේ කියලා. ඒත් ඒ ජනප්‍රියත්වය මම ඔළුවට අරගෙන නැහැ. ජනප්‍රියත්වයෙන් කවදාවත් අයුතු ප්‍රයෝජනයක් අරගෙනත් නැහැ. ජීවිතේ තවත් අත්දැකීමක් විදිහටයි මම ඒක සලකන්නේ.

ඇත්තටම ඔයාට හිතාගන්න බැරිද මේ තරම් පිරිසක් ඔයාට කැමැති ඇයි කියලා?

මම පොඩි කාලේ ඉඳන්ම හැමෝ එක්කම හිනා වෙනවා. කතා කරනවා. කිසිම බේදයක් නැතිව තමයි හැමෝම ඇසුරු කරන්නේ. මගේ මේ මිත්‍රශීලීකමත් ඒ ‘කැමැත්ත’ට බලපාන්න ඇති.

‘මුතු කිරිල්ලී’ රංගනය වෙනුවෙන් ඔයාට අපේ රටේ ප්‍රධාන ටෙලි නාට්‍යය සම්මාන උළෙල දෙකෙන්ම සාධාරණය ඉටු වුණා කියා මට හිතෙනවා?

2008 වසරේ රයිගම් ටෙලි සම්මාන උළෙලේදීත් මේ වසරේ සුමති ටෙලි සම්මාන උළෙලේදීත් ජනප්‍රියම නිළියට හිමි සම්මාන ලබා ගත්තේ මම. ඒක මට ලොකු සතුටක් වගේම මගේ රංගන දිවියට ලැබුණ ආශිර්වාදයක්.

නෙහාරා වෘත්තීය නිළියක් ද කියා මා ඇසුවොත්?

මම රඟපාන්නේ සල්ලි හොයන්නම නෙවේ. හිට් එකක් වෙයි කියලා හිතුණොත් මම ඒක කරනවා. මම හැම ආරාධනාවක්ම බාර ගන්නේ නැහැ. ගොඩක් ඒවා ප්‍රතික්ෂේප කරලාත් තියෙනවා.

රඟපාන්නේ සල්ලි හොයන්න නෙවෙයි කියලා කිව්වට නොමිලේ රඟපාන්නෙත් නැහැනේ?

හැම වැඩක්ම බදාගෙන කරනවාට වඩා මගේ හිතට සෑහෙන එක වැඩක් කළත් මට ඇති. ඒ මම කරන වැඩේට මට අවශ්‍ය මුදල මම ඉල්ලනවා. යම් ඩිමාන්ඩ් එකක් තියා ගන්න තමයි මම ඒ විදිහට කරන්නේ. ඒත් ජනප්‍රියත්වය වෙනුවෙන් ඕනෑම දෙයක් කරන්න මම ලෑස්ති නෑ.

මේ දවස්වල නෙහාරා මොකද කරන්නේ?

රවීන්ද්‍ර විජේරත්න අධ්‍යක්ෂණය කරන ‘සඳ එළිය වගේ’ ටෙලි නාට්‍යයේ රූගත කිරීම්වලට සහභාගි වෙනවා. බණ්ඩාරගම ප්‍රදේශයේ තමයි ඒ රූගත කිරීම් සිදු කෙරෙන්නේ. මහීමා කියලා සුන්දර තරුණියකගේ චරිතය මම නිරූපණය කරනවා. මගේ පෙම්වතා විදිහට රගපාන්නේ නිනෝ ජයකොඩි. ශ්‍රියන්ත මෙන්ඩිස්, කුසුම් රේණු මගේ මවුපියන්ගේ චරිත රඟපානවා. දීපානි සිල්වා, ජගත් චමිල, නදීෂා අලහප්පෙරුම ඇතුළු නළු නිළියක් රැසක්ම රංගනයෙන් දායක වෙන ‘සඳ ඒළිය වගේ’ තවත් සුසිල නිෂ්පාදනයක්.

කොටස් කීයද මේ ටෙලි නාට්‍යයේ?

කොටස් එකසිය පනහකට තමයි දැනට ෂෙඩුල්ඩ් කරලා තියෙන්නේ. ඒත් කොහොම වෙයි ද දන්නේ් නැහැ.

නෙහාරා වැඩිපුර රඟපාලා තියෙන්නේ ‘මෙගා’ ටෙලි නාට්‍යවල. එතකොට ඔයා ‘මෙගා’ කිරිල්ලියක්?

මට ‘සුමති’ සම්මානය හම්බ වුණ වෙලාවේ නළුවෙක් කියලා තිබුණා ‘මෙගා’ ටෙලි නාට්‍යවල රඟපාන අයට විතරයි සම්මාන හම්බ වෙන්නේ කියලා. ඒ කියපු නළුවාත් අපට කලින් ‘මෙගා’වල රඟපෑවා. පස්සේ ඒ විදිහට ‘මෙගා’ සමච්චලයට ලක් කරනවා.

මෙගා, එහෙම නැත්නම් දීර්ඝ ටෙලි නාට්‍යවල ඔයා රඟපාන්නේ කැමැත්තෙන්ද?

කොටස් හාරසීය, පන්සීය දක්වා විකාශය වන ටෙලි නාට්‍යවල රඟපාන්න නම් මම ආස නැහැ. ‘මුතු කිරිල්ලි’ ටෙලි නාට්‍යයත් මුලින් සැලසුම් කරලා තිබුණේ කොටස් දෙසය හැත්තෑ පහකින් නිම කරන්න. ඒත් පස්සේ කොටස් තුන්සිය ගාණක් වුණා. මම මේ කතා කරන්නේ මෙගාවලට විරුද්ධව නෙවේ. ඒ වගේම මෙගාවලට විරුද්ධව කතා කරන අයටත් මම මොකුත් කියන්නේ නැහැ.

ඉදිරියට විකාශය වෙන්න නියමිත සනත් අබේසේකර අධ්‍යක්ෂණය කළ ‘ආදර රිද්ම’ ටෙලි නාට්‍යයේ කෞෂි කියන ප්‍රධාන චරිතයත් මම රඟපෑවා. ලබන වසරේදී එය විකාශය වෙයි. ඒක කොටස් තිහක ටෙලි නාට්‍යයක්.

නෙහාරාට තවම චිත්‍රපටවලට ඇරියුම් ලැබුණේ නැතිද?

රෝයි ද සිල්වා මහත්මයාගේ It’s a Matter of love චිත්‍රපටයේ ජෙනිෆර් කියලා සුළු චරිතයක් රඟපාන්න මට අවස්ථව ලැබුණා. ඒ තමයි මගේ මුල්ම සිනමා අත්දැකීම. මීට කලින් චිත්‍රපට කිහිපයකටම ආරාධනා ලැබුණත් නොයෙක් හේතූ®න් නිසා ඒවා ප්‍රතික්ෂේප කළා.

සිනමාවට ද ඔයා කැමැති නැතිනම් ටෙලි නාට්‍යවලටද?

ඒ දෙකටම. හොඳ චිත්‍රපටවල රඟපාන්නත් මගේ විශේෂ කැමැත්තක් තියෙනවා. මගේ කාලය එනකල් ඒකට මම බලාගෙන ඉන්නවා.

නෙහාරා වැඩියෙන්ම කැමැති නළු, නිළියෝ එහෙම කවුද?

මම ගොඩක්ම කැමැති නළු නිළි යුවළක් තමයි අයිරාංගනී සේරසිංහ සහ එච්. ඒ. පෙරේරා කියන්නේ. ‘මුතු කිරිල්ලී’ කරද්දී ඔවුන් මට බොහෝ දේවල් කියලා දුන්නා. ඒ රංගනය ගැන විතරක් නෙවෙයි, ජීවිතය ගැනත්. නිකං කතා බහ කර කර හිටියත් එයාලගෙන් මට ඉගෙන ගන්න ගොඩක් දේවල් තිබුණා.

ඔයාගේ පවුලේ තොරතුරු ටිකකුත් කියන්නකෝ අපට දැනගන්න?

මගේ ඩැඩා ව්‍යාපාරිකයෙක්. අම්මා ගෘහණියක්. මේ දෙන්නටම හොඳට ඩාන්ස් කරන්න පුළුවන්. මට කලා හැකියාවන් උරුම වුණේ ඒ දෙන්නගෙන් වෙන්නැති. මට මල්ලි කෙනෙක් ඉන්නවා. එයා නෙහාන්. බම්බලපිටිය සාන්ත පීතර විදුහලේ උසස් පෙළ හදාරනවා. ඔය තමයි මගේ තොරතුරු. එතකොට මම මැරි කරලා මේ මාසෙට අවුරුද්දක් පිරෙනවා.

ඇයි ඔයා විවාහ ජීවිතය ගැන, සැමියා ගැන වැඩිපුර මාධ්‍යය ඔස්සේ කතා නොකරන්නේ?

ඇත්තටම එයා කැමැති නැහැ ප්‍රසිද්ධියට. පුවත්පතක ඡායාරූපයකට පවා පෙනී සිටින්න කැමැත්තක් නැහැ.

ප්‍රේම සම්බන්ධයක් උඩ නේද විවාහ වුණේ?

ඔව්. අවුරුදු තුන හමාරක් ඇසුරු කරලා තමයි අපි විවාහ වුණේ. නිර්මාල් තොරතුරු තාක්ෂණය හා සම්බන්ධ රැකියාවකයි නිරත වෙන්නේ. එයාගෙන් ඇත්තටම මගේ කලා කටයුතුවලට ලොකු සහායක් ලැබෙනවා.

අවුරුද්දක් ගෙවිලත් තාම විවාහ ජීවිතයේ වෙනසක් නැහැ වගේ?

අනේ තාම නැහැ. අපි තාම කොල්ලයි, කෙල්ලයි වගේ තමයි ජීවත් වෙන්නේ.

එතකොට ළඟදී වෙනසක් වෙන එකකුත් නැහැ?

ඒවාට තාම පොඩි වැඩියි. ඉදිරියේදී බලමුකෝ.

නෙහාරා පාසල් ගියේ කෙහේද?

වැල්ලවත්ත සාන්ත ලෝරන්ස් විදුහලෙන් තමයි මම අ. පො.ස සා/පෙළ දක්වා ඉගෙන ගත්තේ. ඊට පස්සේ ACBP කෙලේජ් එකෙන් A/L කළා. බිස්නස් මැනේජ්මන්ට් ඇන්ඩ් මාකටින් ඩිග්රි එකට මම සූදානම් වුණත් ඩිප්ලෝමාව දක්වා විතරයි කළේ.

ඇයි ව්‍යාපාර කළමනාකරණය වගේ විෂයක් තෝරා ගන්න හිතුවේ?

පොඩි කාලේ ඉඳන්ම මගේ ෆියුචර් ඇම්බිෂන් එකක් තිබුණේ නැහැ ලොකු වෙලා මේ දේ කරනවා කියලා. ඇත්තටම මම එහෙම බ්‍රයිට් කේස් එකකුත් නෙවේ. පනහට පනහ තිබුණේ. ඩැඩා තමයි කිව්වේ ඉන්ටර්නැෂනල් ස්කූ®ල් එකකින් හරි ඒ වගේ සබ්ජෙක්ට් එකක් ෆලෝ කරන්න කියලා.

ඔයාගේ විනෝදාංශ මොනවාද?

මම පියාමෝ එක ප්ලේ කරනවා. ඉයර් එකට වගේම නොටේෂන් රීඩ් කරන්නත් මට පුළුවන්. ඒ වගේම තරමක් දුරට ගිටාරය වාදනය කරන්න හැකියාවකුත් තියෙනවා. ඊට අමතරව චිත්‍රපට නැරඹීමත් මගේ විනෝදාංශයක්. සිංහල, හින්දි, බටහිර ෆිල්ම් කලෙක්ෂන් එකක් මගෙ ළඟ තියෙනවා.

ඇත්තද ඔයාට උයන්න, පිහින්න බෑ කියන්නේ?

කවුද කියන්නේ. මට ඕනෑම කෑමක් රසට හදන්න පුළුවන්. රයිස් ඇන්ඩ් කරි නම් එහෙම. චයිනිස් නම් එහෙම. මේ ඕනෑම දෙයක්. O/L කරලා මාස තුනක් ගෙදර හිටියානේ. ඒ කාලයේදී අම්මා මට හැම දෙයක්ම කියලා දුන්නා. ගෙදර ඉන්න කොට කෑම හදන්නේ මම.

සංවාද සටහන

අසංක දේවමිත්‍ර පෙරේරා

ඡායාරූප - ටෙනිසන් එදිරිසිංහ

Read More »

මගේ බිරිඳ "මංජුලා" ඩිල්ස්කූප් පහරට හරි කැමතියි

-ටී.එම්. ඩිල්ෂාන්

අපට යළිත් ක්‍රිකට් වසන්තයක් උදාවී තිබේ.

ශ්‍රී ලංකා කණ්ඩායම මේ දිනවල සිදුකරන ඉන්දීය සංචාරයේ පළමු ටෙස්ට් තරගය හෙට (16) අහමාද්බාද්හිදී ඇරැඹෙයි. ටෙස්ට් තරග 3 ක් 20 යි 20 තරග 2 ක් සහ එක්දින තරග 5 ක් මෙහිදී ක්‍රීඩා කිරීමට නියමිත අතර මෙවර අපේ ක්‍රීඩා ලෝලීන්ගේ බලාපොරොත්තුව බවට පත් වූ සුවිශේෂී ක්‍රීඩකයෙකි.

අංක 5 ස්ථානයේ ක්‍රීඩා කරමින් සිට මේ වසර මුලදී ආරම්භක පිතිකරුවකු ලෙස පිටියට පිවිසි ඔහු එහිදී සනත් ජයසූරිය සමඟ එක්ව ආකර්ෂණීය ලෙස ක්‍රීඩා කරමින් වඩාත් සාර්ථකත්වයට පත්වුණා.

ඉන්දීය පි‍්‍රමියර් ලීග් (IPL) තරගාවලියේදී දිල්ලි ඩෙයාඩේවිල්ස් පිල නියෝජනය කරමින් සුවිශේෂ දස්කම් දැක්වූ ඔහු, 2009 ජාත්‍යන්තර ක්‍රිකට් කවුන්සිල විස්සයි 20 තරගාවලියේදී හිසට උඩින් එල්ල කළ ෆ්ලික් පහර නිසා ක්‍රිකට් ලෝකයේ වඩාත් කතා බහට ලක්වුණා.

එහිදී ඔහු පෞද්ගලිකව ලබාගත් ලකුණු ගණනින් 317 ක් වූ අතර පිත්තෙන් පන්දු රැකීමෙන් සහ පන්දු යැවීමෙන් දැක්වූ දක්‍ෂතා නිසා තරගාවලියේ වීරයා සම්මානය ද දිනාගත් අතර ශ්‍රී ලංකාව අනුශූරයින් බවට ද පත්වුණා.

ජාත්‍යන්තර ක්‍රිකට් ඉතිහාසයේ එදා මෙදා තුර ක්‍රීඩකයකුගේ නමින් නම් කර ඇති පහර ‘ඩිල්ස්කූප්’ පහර වන අතර මේ නිසාම ඔහුගේ නමත්, ශ්‍රී ලංකා මාතාවගේ නමත් ක්‍රිකට් වංශ කතාවේ නොමැකෙන ලෙස සනිටුහන් වෙලා.

මේ සියලු දක්‍ෂතා නිසාම 2009 වසරේ ICC 20 යි 20 දක්‍ෂතම ක්‍රීඩකයා සම්මානයෙන් ද (ICC Twenty 20 International Performance of the year 2009) පිදුම් ලැබූ ඔහු තිලකරත්න මුදියන්සේලාගේ ඩිල්ෂාන්.

අපේ රටේ ක්‍රීඩා ලෝලීන්ගේ ප්‍රබලතම බලාපොරොත්තු වූ අපේ කතා නායකයා. ඉන්දීය සංචාරයට හෝරා කිහිපයකට පෙර කාර්ය බහුලත්වය මැද ‘රසඳුන’ සමඟ සම්මුඛ වන්නට තරම් නිහතමානී වුණා.

මෙවර ICC දක්‍ෂතම 20 යි 20 ක්‍රීඩකයා ඔබ. ඒ වගේම අපේ රටේ ජනපි‍්‍රයම ක්‍රිකට් ක්‍රීඩකයා වෙමින් පළමු සියැට් සම්මාන උලෙළේ සම්මාන 4 කින් පිදුම් ලබනවා.

ඇත්තටම මේ සම්මාන ලැබීම ගැන මට ගොඩක් සතුටුයි. මේ වගේ අගය කිරීම් කරන විට ක්‍රීඩකයින්ගේ සිතට ශක්තියක් ධෛර්යයක් එනවා. මානසික වශයෙන් විශාල තෘප්තියක් ලැබෙනවා. පසුගිය වසර පුරා මම දැක්වූ දස්කම් නිසා මට මේ සම්මාන ලැබුණා කියලයි මම හිතන්නේ. මෙය මගේ ඉදිරි ක්‍රිකට්වලට ලොකු ශක්තියක් ධෛර්යයක්.

ඔබේ ක්‍රීඩා දිවියේ මේ වෙනස ආරම්භ වන්නේ IPL තරගාවලියෙන් පසුව කියා කීවොත්

IPL තරගාවලියේදී මගේ දස්කම් කිසියම් ප්‍රමාණයකට වර්ධනය වුණා වෙන්න පුළුවන්. එහිදී මම හැම තරගයකම වගේ ලකුණු අතර සිටියා.

එහෙත් මගේ මේ දස්කම්වලට විශේෂිතම හේතුව ලෙස මම දකින්නේ ශ්‍රී ලංකා කණ්ඩායමේ මගේ පිතිකරු ස්ථානය මාරුවීමයි.

ඔබගේ ‘ඩිල්ස්කූප්’ පහර ගැන ඔබට ආඩම්බරයක් දැනෙනවද? ඒ වගේම ක්ලයිව් ලොයිඩ් ඔබේ පහර අගය කරලා තිබුණා.

ඒ වගේ ලෝක ප්‍රසිද්ධ ක්‍රීඩකයකුගේ ප්‍රකාශය පිළිබඳව මම නිහතමානීව ආඩම්බර වනවා. ඒ වගේම මම පෞද්ගලිකවම සතුටු වනවා මගේ නමින් ඒ පහර හැඳින්වීම ගැන. මා දන්නා තරමින් ක්‍රීඩකයකුගේ නමින් ක්‍රිකට් පහරක් නම් කළ පළමු වතාව මේ. එය මට පමණක් නොවේ රටටත් ගෞරවයක් ලෙස මා සලකනවා.

ඩිල්ස් කූප් පහරේ ආරම්භය ඇති වුණේ කොහොමද?

ඉන්දීය 20 යි 20 තරගාවලියේදී ලකුණු අතරට එන්න ඕන වුණාම මම පැඩල් ස්වීප් ෂොට් එක ගැහුවා. මේ පහරේ අතුරු ප්‍රතිඵලයක් ලෙස තමයි ඩිල්ස් කූප් පහර බිහිවන්නේ.

ඉන්පස්සෙ මට වැටහුණා මෙය හොඳින් එල්ල කරන්න පුළුවන් කියන එක. ඒ අනුව දිගින් දිගටම කැපවෙලා පුහුණු වුණා. දැන් මට ලොකු විශ්වාසයක් තියෙනවා ඒ පහර නිවැරැදිව එල්ල කරන්න පුළුවන් කියන එක.

මේ පහර දිගටම එල්ල කිරීම නිසා ඉදිරියේදී ඔබ අවදානමකට ලක්වේවිද?

මේ පහර එල්ල කරන්නට ඕන මොන පන්දුවට ද කියලා මට මේ වන විට ඉතා හොඳ විශ්වාසනීයත්වයක් ගොඩ නැගී තිබෙනවා. ඒ වගේම මෙය එල්ල කරන්නේ විකට් රකින්නාගේ හිසට ඉහළින්. සාමාන්‍යයෙන් පිටියේ පන්දු රැකීමේදී මෙතැනට ක්‍රීඩකයෙක් යෙදවීමට අපහසුයි. ඒ නිසා මගේ විශ්වාසනීයත්වය තිබෙන තුරු මේ පහර සාර්ථකව එල්ල කිරීමට මට හැකිවේවි යැයි සිතනවා.

ඩිල්ස් කූප් පහර දැන් අනෙත් ක්‍රීඩකයින් අතරත් ජනපි‍්‍රයයි.

ඇත්තෙන්ම දැන් මේ පහර ගහන්න තවත් බොහෝ ක්‍රීඩකයින් උත්සාහ කරනවා. සමහර වෙලාවට මාත් සමඟ මේ පහර එල්ල කිරීම ගැන කතා කරන අවස්ථාත් තිබෙනවා. ක්‍රීඩකයකුට මේ වගේ අලුත් පහරවල් තුළින් ලකුණු අතරට එන්න පුළුවන්. එය ඇත්තෙන්ම හොඳ දෙයක්.

මේ ගැන ලැබෙන ප්‍රතිචාර ගැනත් කියන්න.

ප්‍රතිචාර නම් ගොඩක් ලැබෙනවා. මගේ දැන් බිරිඳ මංජුලා ‘ඩිල්ස්කූප්’ එකට හරිම කැමතියි. ඇය හැම තිස්සෙම මාව දිරිමත් කරනවා.

විශේෂ දෙයක් කියන්න ඕන මම මේ මෑතකාලයේදී ලැබූ ජයග්‍රහණ පිටුපස්සේ ඉන්නේ ඇයයි. ඇය රඟපෑමෙන්, ව්‍යාපාරවලින් ඉවත්වෙලා මගේ ක්‍රීඩා ජීවිතය දියුණු කරගන්න අවශ්‍ය හැම සහයෝගයක්ම දෙනවා.

ඔබ සම්මානයට ලක්වීම පිළිබඳව ස්තූති කරන්නේ කාටද?

මම ඒ ගැන විශේෂයෙන් ස්තූති කරන්නෙ මගේ ආදරණීය ප්‍රේක්‍ෂකයන්ට. මාව පි‍්‍රය කරන මගේ ක්‍රීඩා ලෝලීන්ට. People’s Award කියන්නේ ජනතාව අතරේ ඉන්න ක්‍රීඩකයා කියන එකයි. එයින් අදහස් කරන්නේ මට ජනතාවගේ ආශීර්වාදය හැම තිස්සෙම තිබෙන බවයි. මෙය මට ඉදිරියට යන්න තවත් ධෛර්යයක්. ශක්තියක්.

ඔබේ පිතිකරු ස්ථානයේ වෙනස ගැන කතා කළොත්.

මම ගොඩක් වාසනාවන්තයි සනත් ජයසූරිය වැනි ප්‍රවීණ ක්‍රීඩකයා සමඟ ඉනිම ආරම්භ කරන්න ලැබීම. දැනට ලෝකයේ සිටින ප්‍රහාරාත්මකම, වැඩිම එක්දින තරග ගණනක් ක්‍රීඩා කරලා අත්දැකීම් ඇති සනත් අයියා එක්ක පිටියට ගිය විට මට පුදුම ශක්තියක් ඇති වුණා. ඔහු මට ඔහුගේ අත්දැකීම් තුළින් ලබාදුන් උපදෙස් මගේ සාර්ථකත්වයට බලපාන්න ඇති.

අනෙත් කරුණ තමයි ඔහු අනෙක් අන්තයේ ඉන්න විට මට බයක් නැතිව පහරවල් එල්ල කරන්න ශක්තිය ආවා. මට මා ගැනම විශ්වාසයක් ඇති වුණා. ඒ අතින් මම හරිම වාසනාවන්තයි කියල කියන්න ඕන.

ඔබට කණ්ඩායමෙන් ලැබෙන ප්‍රතිචාර.

දැනට ටෙස්ට් කණ්ඩායමේ ඉන්න ජ්‍යෙෂ්ඨතම ක්‍රීඩකයින් වන්නේ මහේල, මුරලි, සංගා සහ මම. මට මේ අයගෙන් උපරිම සහායක් ලැබෙනවා. අපි හතර දෙනා දැන් අවුරුදු 10 කට වැඩි කාලයක් එකට ක්‍රීඩා කරනවා. ඉතින් අපි තරගයකට ගියහම අපේ අත්දැකීම් එකතු කරල කණ්ඩායම ජයග්‍රහණය කරා ගෙන යන්න තමයි උත්සාහ කරන්නෙ. සංගා තවම නායකත්වයට අලුත්. ඒ නිසා අපි ඔහුට අවශ්‍ය සහයෝගය ලබා දෙනවා.

තවත් විශේෂ දෙයක් කියන්න ඕන. මෙතෙක් අපි ඉතාමත් සහයෝගයෙන් ක්‍රීඩා කළා. ඉතින් අපේ වගකීම වන්නේ අලුතෙන් කණ්ඩායමට එන අය දිරිමත් කරලා ඔවුන්ගේ උපරිම දක්‍ෂතාව අරගෙන කණ්ඩායම ජයග්‍රහණය කරවීම.

එහිදී කණ්ඩායමේ ජ්‍යෙෂ්ඨයින් සහ නවකයින් අතර ලොකු පරතරයක් නැහැ කියල පෙන්වන්න ඕන. ඔක්කොම එකට වැඩ කළොත් ඉදිරියට එන තරගවලට සාර්ථකව මුහුණ දීලා ජයග්‍රහණ ලබන්න පුළුවන් බව ඔවුන්ට ඒත්තු ගන්වන්න ඕන. ඒ තුළින් රට ජයග්‍රහණය කරවීම අපේ වගකීම.

ජ්‍යෙෂ්ඨත්වය අනුව අනාගතයේදී නායකත්වය පිළිබඳව බලාපොරොත්තුවක් නැද්ද?

මගේ කිසිම බලාපොරොත්තුවක් නෑ නායකත්වය ගැන. මගේ එකම ඉලක්කය හොඳින් ක්‍රීඩා කරල ඒ තුළින් කණ්ඩායමේ ශක්තිය වැඩි කර ජයග්‍රහණ ලබන්නයි.

මගේ දක්‍ෂතා රට වෙනුවෙන් වැය කරලා ඒ ලබන ජයග්‍රහණ තුළින් මට අවංකවම සතුටු විය හැකියි.

ඔබේ පෞද්ගලික තොරතුරු ටිකකුත් කියන්න.

මගේ පියා ජුනයිඩීන්. මව නන්දනී. මගේ මල්ලි සම්පත් බදුරලිය ක්‍රීඩා සමාජයට ක්‍රිකට් ක්‍රීඩා කරනවා. අචිනී, ආශා සහ කුමාරි මගේ නංගිලා තුන්දෙනා. මම ඉපදුණේ කළුතර. පාසල් ගියේ කළුතර විද්‍යාලයට. පවුලේ අයගෙන් මගේ ක්‍රීඩා ජීවිතයට ලැබුණේ වචනයෙන් කියන්න බැරි සහයෝගයක්.

මගේ බිරිඳ මංජුලා තිළිණි. පුතා රෙසඳු වයස අවුරුදු 7 යි. දුව රිසිඳි වයස අවුරුද්දයි. මේ අය තමයි දැන් මගේ ලෝකය.

ඉඳුනිල් වීරරත්න

Read More »

අපේ ජැකීටත් කතා හැදෙයි

ශ්‍රී ලාංකේක සුරූපිනියක් මුල් වතාවට බොලිවුඩ් චිත්‍රපටයක ප්‍රධාන චරිතයක් නිරූපණය කරන අයුරු දැන් ඔබටත් නරඹන්නට ලැබෙනවා. සැබවින් ම එය මෙරට බොලිවුඩ් සිනමා රසික රසිකාවියන්ට අමතක නොවන අත්දැකීමක් වේවි.

මේ දුර්ලභ අවස්ථාව මෙරට රසික පරපුරට ලැබෙන්නේ ‘ඇලඩින්’ චිත්‍රපටයෙන්. මෙහි ප්‍රධාන චරිතයක් නිරූපණය කරන යුවතිය ජැකලයින් ෆර්නැන්ඩස් බව දැන් ඔබ හොඳින් ම දන්නවා ඇති. ඇය පිළිබඳ උණුසුම් තොරතුරු අප මීට පෙර මේ පිටුවේ ම සටහන් කළා.

ජැකලයින් උපන්නේ 1985 ජූනි 12 වැනි දා. සමාජ සේවාවන්ටත් ජැකලයින් ප්‍රිය කරනවා. ඒ නිසා තමයි ඇය ලංකාවේ ක්‍රියාත්මක වූ ස්වේච්ඡා සංවිධානයකට බැඳී දුගී දුප්පත් අය බල ගැන්වීමේ වැඩසටහන්වලට මහත් කැමැත්තකින් සහභාගි වුණේ.

2006 වසරේ පැවති ශ්‍රී ලංකා අවිවාහක රූ රැජින (මිස් ශ්‍රී ලංකා) තරගයේ ජය කිරුළ පැලඳුණේ ජැකලයින්ටයි. ඒ නිසා ම ඇයට එම වසරේ පැවති ලෝක අවිවාහක රූ රැජන තරගයටත් ශ්‍රී ලංකාව නියෝජනය කරමින් සහභාගි වීමේ භාග්‍යය උදා වුණා.

මේ වනවිට ජැකලයින් බොලිවුඩ් සිනමා ලෝකයේ ජනප්‍රිය තරුවක් බවට පත් ව සිටිනවා. මේ නිසා ම ඇයටත් කට කතාවලට මුහුණදෙන්නට සිදුවෙලා. පසුගිය සතියේ බොලිවුඩ් පුරයේ විද්්‍යුත් මාධ්‍ය කිහිපයක් ම ජැකලයින් ගැන උණුසුම් පුවතක් වාර්තා කර තිබුණා.

එයින් කියැවුණේ එක්තරා ඉරිදා සන්ධ්‍යාවකදී ‘ඇලඩින්’ චිත්‍රපටයේ අධ්‍යක්ෂ සුජෝයි සෝෂ් සහ ජැකලයින් සුපිරි අවන්හලකදී හමුවූ බවයි.

ඒ විතරක් නොවෙයි. ඔවුන් දෙදෙනා ලොව පුරා ප්‍රකටව තිබෙන එක්තරා අයිස්ක්‍රීම් වර්ගයක රස බලමින් සිටියාය කියලත් ඒ ආරංචිවල සටහන් වී තිබුණා. ඉන්දියාවේ බන්ද්‍රා ප්‍රදේශයේ පිහිටා තිබෙන සුප්‍රසිද්ධ අවන්හලකදීලු මේ දෙදෙනා අයිස් ක්‍රීම් රස බලා ඇත්තේ.

මේ සිද්ධිය දැනගත්තා එක්තරා මාධ්‍යවේදියෙකුට හදිසියේ ම ‘ඇලඩින්’ චිත්‍රපටයේ කටයුතු කළ කාර්මික ශිල්පියෙකු මුණ ගැසුණා. අවස්ථාවෙන් ප්‍රයෝජනයක් ගත් මාධ්‍යවේදියා මේ ශිල්පියාගෙන් විමසුවේ අධ්‍යක්ෂ සුජෝයි සහ ජැකලයින් අතර තිබෙන මේ ඇඟෑලුම්කම මොකක්ද කියලයි. එවිට ‘ඇලඩින්’ චිත්‍රපටයේ කාර්මික ශිල්පියා පැවසුවේ මෙන්න මෙහෙම කතාවක්... ජැකලයින් ‘ඇලඩින්’ චිත්‍රපටයේ රඟපාන්න ආවෙ රික්ෂෝ එකෙන්.

ටික දවසක් ගියාට පස්සෙ එයා රූපගත කරන තැන්වලට ආවෙ අලුත් ම අලුත් ‘හොන්ඩා සිවික්’ කාර් එකකින්. මං හිතන්නෙ ඒ කාර් එකේ වටිනාකම රුපියල් ලක්ෂ 15 ක් විතර ඇති. ඇත්ත ද බොරු ද මන්දා, සමහරු කියන්නෙ ඔය කාර් එක ජැකලයින්ට අධ්‍යක්ෂ සුජෝයි තෑගි දීපු එකක් කියලයි!”

මේ කතාවල ඇත්ත නැත්ත සහසුද්දෙන් ම දැනගන්න ඕනෙ නිසා මාධ්‍යවේදියා ජැකලයින්ටත් කතා කළා.

ඇය ඉතාම කැමැත්තෙන් ඔහු සමඟ කතා කළා. “මුලින් ම කියන්න ඕනෙ, ඔය ‘හොන්ඩා සිවික්’ කාර් එක මට සුජෝයිගෙන් තෑගි ලැබුණු එකක් නෙමෙයි කියලා. එහෙම තෑග්ගක් මට ලැබුණේ නැහැ. ඒක අමූලික බොරුවක්.

මිනිස්සුන්ට ඕනෙ ඕනෙ හැටියට කටකතා හදන්න පුළුවන්. මේකත් ඒ වගේ කට කතාවක් විතරයි. අයිස් ක්‍රීම් කතාවෙ නම් ඇත්තක් තියෙනවා.

හැබැයි එදා මාත් එක්ක හිටියෙ සුජෝයි විතරක් නෙමෙයි. රිටීෂුත් (රිටීෂ් දේශ්මුඛ්) එතන හිටියා. අපි තුන්දෙනාම අයිස් ක්‍රීම් කෑවා. ඉතින් ඒකෙ ඇති වැරැද්ද මොකද්ද?” ජැකලයින් පෙරළා ප්‍රශ්න කළා.

ඉන්පසුව ‘ඇලඩින්’ චිත්‍රපටයේ අධ්‍යක්ෂ සුජෝයි සෝෂ් ද මේ ගැන කතා කළ බවයි දැනගන්නට ලැබුණේ. “ජැකලයින් මගේ හොඳ යෙහෙළියක්. අපි සමහර වෙලාවට විනෝද ගමන් එහෙමත් යනවා. හැබැයි ඒ යන්නෙ තවත් යාළුවො ගොඩක් එක්කයි.

මේ ළඟදීත් අපි තරු පහේ හෝටලයක තිබුණු ‘ඇලඩින්’ චිත්‍රපටයේ ප්‍රචාරක වැඩසටහනකට සහභාගි වුණා. එහෙම ගමන් බිමන් ගියා ය කියලා අපි අතරෙ ඊට වඩා වෙනස් සම්බන්ධකමක් නැහැ” සුජෝයි තරයේ ම කියා සිටියා.

සුජෝයි ළඟදීම තවත් චිත්‍රපට 3 ක් ම අධ්‍යක්ෂණය කරන්නට සූදානම් වෙමින් සිටිනවා. මේ සියලුම චිත්‍රපටවල ප්‍රධාන නිළිය හැටියට රඟපාන්න තෝරා ගෙන ඇත්තේ ජැකලයින්වයි.

ඒ වෙනුවෙන්වූ ගිවිසුම් වලට මේ වනවිට අත්සන් තබා ඇති බවයි ඇය පවසන්නේ. කොහොම වෙතත් ඒ චිත්‍රපටවල තොරතුරු තවම හෙළි කළ නොහැකි බවත් ඇය කියා සිටියා.

Read More »