Ayesha Sandamali speaks

මම ජීවිතේ කළ ලොකුම මෝඩකම මෝස්තර නිරූපිකාවක් වීම

අයේෂා සඳමාලිව සෑහෙන්න කාලෙකින් අපි දුටුවේ නැහැ.
කොහෙද අයේෂා මෙච්චර කල් හිටියේ?
ගෙදර, ගෙදර . . .
ඒ මොකෝ?
මගේ පවුලට පුංචි අමුත්තෙක් එකතු වුණා. මව් පදවිය ලැබුණු හින්දා පුංචි විවේකයක් ගත්තා කලාවෙන්. නමුත් බබත් එක්ක බොහොම කාර්යබහුල වුණා.
සාමාන්‍යයෙන් රංගන ශිල්පිණියක් මවක් වන්නට සිටියදී සෑහෙන්න පුවත්පත් ලිපි පළවෙනවා. නමුත් ඔබට වැඩි ප්‍රචාරණයක් ලැබුණේ නැහැ?
කොහොමත් මම මව් පදවිය ලැබීමට ආසන්නව සිටිය කාලයේදී මාධ්‍යයට පෙනී සිටියේ හරිම අඩුවෙන්. සමහරු මම අම්මා කෙනෙක් වුණා කියලා දන්නේවත් නැහැ. මම රට හැර ගිහිල්ලා කියල ඇතැම් අය හිතාගෙන හිටියා. කලාවෙන් මම සදහටම සමු අරගෙන කියලත් කතා හැදුණා.
මව් පදවිය ලැබිලත් ඔබ කාලයක් තිස්සේ ඔබ හිටියේ මාධ්‍යයට වහං වෙලා. ඇයි ඒ?
මම ටිකක් මහත් වුණා. ඒ විදිහට මාධ්‍යය ඉදිරියට එන්න මම කැමැති වුණේ නැහැ. අනික නිළියක් කැතට දකින්න මිනිස්සු ආසත් නැහැනෙ. මම හිතුවා පෙර පරිදිම ඇඟ හදාගෙන නැවතත් මිනිස්සු අතරට ආවොත් හොඳයි කියලා.
සෑහෙන්න ව්‍යායාම් කරන්නට ඇති ඇඟ අඩු කර ගන්න?
කිව්වට විශ්වාස කරයි ද මන්දා මම කිසිම ව්‍යායාමයක් කළේ නැහැ. ඇඟ අඩු කරගන්න කාත්‍රිම බෙහෙත් වර්ග බිව්වෙත් නැහැ. ස්වාභාවික ලෙසම කෙට්ටු වෙනකම් ඉවසීමෙන් හිටියා.
මේ වන විට ඔබ යළිත් කලා ලොවට ඇවිත්. මොන වගේ නිර්මාණවලට ද දායක වුණේ?
තවම නම් රඟපෑවේ නැහැ. හැබැයි නිවේදනයට සම්බන්ධ වුණා.
හිරු නාළිකාවේ?
ඔව්. එහි වින්දනීය උදෑසන නම් වූ සජීවි වැඩසටහනයි මම මෙහෙය වන්නේ.
ඔබේ පුතු ඔබේ වැඩසටහන බලනවද?
එයාට දැන් අවුරුදු දෙකයි. බබා ටීවී එක දිහා බලාගෙන ඊඳලා ගෙදර ආවම කියනවා යන්න එපාලු මට වැඩසටහන කරන්න. හරිම අකැමැතියි එයා මම හැම උදෑසනකම ඒකට යනවට.
ආයේ පෙම්වතියගේ චරිතය රඟපානවාද?
Why Not  මවක් වුණා කියලා මං වයසට ගිහිල්ලා නැහැනෙ. ඒත් මම දැන් කැමැති ගැමි චරිතයකින් මතුවෙන්න.
කැතවෙයි කියන බයට සමහර නිළියෝ මව් පදවිය ලබන්න පමා කර ගන්නවා. ඒ අය ගැන මොනවද කියන්න තියෙන්නේ?
ගැහැණු ළමයකු වුණාම නිසි කාලෙදි නිසි විදිහට නිසි දේවල් කරගන්න ඕනෑ. මව් පදවිය වුණත් එහෙමයි. මට දැන් හිතෙනවා අනේ මම මීට කලින් මවක් වුණා නම් හොඳයි කියලා. වෘත්තීය ජීවිතය තුළ නිළියක් විදිහට වැඩ කරන්න පටන් ගත්තම කාල වේලාව යනවා දැනෙන්නේ නැහැ. එය බොහෝ දෙනාට තියෙන ගැටළුවක්. ඒක හින්දා මව් සිහිනය නෙදැනුවත්වම පමා වෙනවා. ඒක නොවිය යුත්තක්.
අන්තිමට ඔබ සම්බන්ධ වුණු නිර්මාණ මොනවාද?
සක්විත්තෝ සහ ලොක්කයියා.
ටෙලි සිතුවම්වලින් අයේෂාගේ රුව නිතර දුටුවත් සිනමාවට තවමත් ඔබ සම්බන්ධ වුණේ නැහැ. ඇයි එහෙම වුණේ?
මම පුදුම ආසාවකින් ඉන්නේ සිනමාවට එකතු වෙන්න. නමුත් මට ආරාධනා ලැබුණේ නැති තරම්. එයට හේතුව නම් මට කියන්න තේරෙන්නේ නැහැ. මම හිතන්නේ මාව සිනමාවට ගැළපෙන්නේ නැතිව ඇති.
රංගන ශිල්පිනියන්ගෙන් බහුතරයක් ව්‍යාපාරිකයෝ. අයේෂාත් එහෙම ව්‍යාපාරවලට යොමු වෙලා හිටියා?
ඒ සේරම බංකොලොත් වුණානේ.
හේතුව?
මම කාර්යබහුල වෙලා හිටිය කාලෙදි තමයි ව්‍යාපාර ආරම්භ කළේ. සැලොන් එකකුත් කළා. නමුත් මට නිතර ව්‍යාපාරික ස්ථානවල රැඳෙන්න කාල වේලාවක් නැති වුණා. අන්තිමේ ඒවා සේරම වහලා දැම්මා.
අයේෂා කාලයක් මෝස්තර නිරූපණ ශිල්පිනියක වශයෙන්ද කටයුතු කළා නේද?
ඔව්. අන්න ඒ කාලේ තමයි මම ජීවිතේ කළ ලොකුම මෝඩකම කළේ.
ඒ මොකක්ද?
ඒ කාලේ හිතාගෙන හිටියේ කලාවේ එක අංශයක් නියෝජනය කළොත් තවත් අංශයකට නොයා ඉන්න ඕනෑ කියලා. ඒ හින්දා ඒ කාලේ මට රංගනයට ලැබුණු ආරාධනා සියල්ල ප්‍රතික්ෂේප කළා. අද හිතෙනවා ඒ අවස්ථාව මම බාර ගත්තා නම් අද වන විට කොච්චර නම් මම ඉදිරියට ගිහිල්ලා ද කියලා.
අද හදන නාට්‍යවලට අයේෂා ඒතරම්ම කැමැති නැහැ වගෙයි?
මෙහෙමයි, මම ගෙදර හිටපු කාලය තුළ නාට්‍ය බොහොමයක් නැරැඹුවා. ඒවායින් බහුතරයකට කිසිම පදනමක් නැහැ. කරන්න ඕනෑවට කරනවා වගෙයි. හැබැයි අප නිර්මාණකරුවන්ට හොඳ නිර්මාණ හැකියාවක් තියෙනවා. එහෙම තියෙද්දිත් මෙවන් වූ නිර්මාණ කිරීම මට මහත් වූ ගැටළුවක්.
ඔබ රඟනොපෑ කාලය තුළදී නවපරපුර නියෝජනය කරමින් රංගන ශිල්පිණියෝ රැසක් බිහි වුණා. ඒ අතරට ඔබට පහසුවෙන් එක්වෙන්න පුළුවන් වේවිද?
කොච්චර අය ආවත් මට එයාලව අභියෝගයක් හැටියට දැනෙන්නේ නැහැ. මම බොහොම ආසයි තවත් අය මේ ක්ෂේත්‍රයට එනවට. මට හැමෝමත් එක්කම සුහදව වැඩ කරන්න හැකියාව තියෙනවා.
ඔබේ පුංචි පවුල ගැන සඳහන් කරමින් මේ කතාව නිමා කරමු?
මගේ මහත්තයා දුලිප් සහ පුතු අකේන් එක්ක හරිම සුන්දර ජීවිතයක් ගත කරනවා මම.

සටහන - ප්‍රසාද් සමරතුංග

සේයාරූ - ශාන් රූපස්සර

Read More »